මේ ඇරැඹී ඇත්තේ බැති සිතින් පේවී බුදුන්, දහම්, සඟුන් සරණ යමින් වන්දනාමාන කරමින් පෙහෙවස් සමාදම් වී පින් රැස් කරගන්නා උතුම් වෙසක් සමයයි. සිදුහත් උපත, බුදුවීම හා බුදුරජාණන් වහන්සේගේ පිරිනිවන් පෑම මූලික කරගත් උතුම් වෙසක් පො‍ෙහාය ලොව පුරා විසිරී හිඳින බොදුනුවන්ට මංගල්‍යයකි. මේ කාලයේ බොහෝ බෞද්ධයන් දැහැමි සිත් පෙරදැරි කරගනිමින් තම ජීවිතය ආගමානුකූලව ගෙවන්නට වෙහෙසෙති. තමන්ගේ ජීවිතය සුවපත් කරගන්නට, තමන් ඇසුරු කරන අයගේ ජීවිත සුවපත් කරන්නට, මරණින් මතු සුගතියේ ඉපදෙන්නට පින්කම් කරති.
තරුණී සමඟ සෙනෙහසින් බැඳී හිඳින අපේ බොදුනුවන් ද මේ කාලය දැහැමි සිතින් ගෙවන්නට නිර්මාංස කෑම කන්නට වෙන්කරයි. ඒ නිසාම අපි පින්බර වෙසක් මාසය පුරාවටම ඔබට නිර්මාංස ආහාර වට්ටෝරු තිළිණ කරන්නෙමු. ඔබේ ගෙවත්තෙන්, වෙළෙඳපොළෙන් පහසුවෙන් සපයාගත හැකි දේවල් උපයෝගී කරගෙන පෝෂණීය බවින් හා රසයෙන් අනූනව මෙලෙස නිර්මාංස කෑම සකසා ගනිමු.
උපදෙස් හා ඡායාරූප
ඉතාලියේ පර්මා හි සූපවේදිනී
ජනනී ගුරුසිංහ
කොහිල හාල් පොල් බැදලා උයමු
අවශ්‍ය දේවල්
කොහිල අල 3 ක්
(බර ග්‍රෑම් 300 ක් පමණ)
ලොකු ලූනු ගෙඩි 1/2 ක්
සුදුලූනු බික් 2 ක්
ඉඟුරු පොඩි කොටසක්
අමු මිරිස් කරල් 2 ක්
පොල් කිරි කෝප්ප 2 ක්
කහ කුඩු තේ හැඳි 1/4 ක්
මිරිස් කුඩු තේ හැඳි 1 ක්
තුනපහ තේ හැඳි 1 ක්
මස් උයන්න පාවිච්චි කරන
තුනපහ තේ හැඳි 1 ක්
කුරුඳු පොත්තක්
එනසාල් 2 ක්, කරාබු නැටි 2 ක්
තෙල් මේස හැඳි 2 ක්
හාල් මේස හැඳි 2 ක්
පොල් මේස හැඳි 2 ක්
කරපිංචා කොළ කිහිපයක්
රම්පෙ
රස අනුව ලුණු
සාදන ආකාරය
කොහිල වටේ ශුද්ධකර සෝදා කුට්ටි වෙන්න කපාගන්න. මිරිස් තුනපහ කබලේ බැද ගන්න. හාල් සහ පොල් කබලේ බැද කොටාගන්න. මැටි ඇතිළියක් ළිප තබා තෙල් එක්කර එයට කරපිංචා, ලොකු ලූනු, තළාගත් සුදුලූනු, අමු ඉඟුරු, කුරුඳු, එනසාල්, කරාබු නැටි එක් කරන්න. තෙලෙන් බැදීගෙන එනවිට අමු මිරිස් එක් කරන්න. එයට බැදගත් මිරිස්, තුනපහ, මස් උයන්න ගන්න තුනපහ, කහ, රස අනුව ලුණු, බැද කුඩු කරගත් හාල් පොල් එකතු කරන්න.
කොහිල අල ද එකතුකර හොඳින් කලවම්කර මඳ ගින්දරේ පොඩි වෙලාවක් තෙලෙන් තැම්බෙන්න දෙන්න. තෙලෙන් තැම්බුණු කොහිල, පොල් කිරි එකතුකර මඳ ගින්දරේම කිරි හිඳෙනකම් හිමින් තැම්බෙන්න දෙන්න. ලස්සන පාටක් එන්න මිරිස්, තුනපහ බැදලම එක් කරන්න. ඔබට රස අනුව මිරිස් තව එක් කළ හැකියි.
---------------------------------------
හතු සීනි සම්බෝලය
අවශ්‍ය දේවල්
ඕනෑම හතු වර්ගයකින් ග්‍රෑම් 500 ක්
ලූනු ග්‍රෑම් 600 ක්
සුදුලූනු බික් 1 ක්
කෑලි මිරිස් තේ හැඳි 2 ක්
මිරිස් කුඩු තේ හැඳි 1/2 ක්
කහ කුඩු තේ හැඳි 1/4 ක්
සීනි තේ හැඳි 1 1/2 ක්
රස අනුව ලුණු
සියඹලා ඉස්ම තේ හැඳි 1 ක්
එනසාල් 3 ක්
කරාබු නැටි 2 ක්
කරපිංචා ටිකක්
රම්පෙ
කුරුඳු පොතු කැබලි 2 ක්
හතු බැද ගැනීමට තෙල්
සීනි සම්බෝලය සාදා ගැනීමට තෙල් මේස හැඳි 3 ක් පමණ
සාදන ආකාරය
හතු හොඳින් සෝදා පිරිසුදුකර වතුර වියළා ගන්න. දැන් තීරු වෙන්න කපන්න. සුදුසු භාජනයක් ළිප තබා එයට තෙල් පොඩ්ඩක් වෙන්න එකතුකර කපාගත් හතු අතුරා රන්වන් පාට වනතුරු බැදගන්න.
ගැඹුරු තෙලේ බදින්න ඕනේ නෑ. තෙල් පොඩ්ඩක් වෙන්න එක්කර හැන්දෙන් එහාට මෙහාට කරමින් බැදගන්න. බැදගත් හතු වෙනත් භාජනයකට අයින් කරන්න.
වැඩිපුර තෙල් ද අයින් කරන්න. කපාගත් ලූනු හා තළාගත් සුදුලූනු, රස අනුව ලුණු, මිරිස් කුඩු, කහ කුඩු, කෑලි මිරිස්, රම්පෙ, කරපිංචා, කුරුඳු, එනසාල්, කරාබු නැටි මේ සියල්ල එක් කරන්න.
දැන් හතු බැදපූ භාජනෙම වැඩිපුර තෙල් ඉවත්කර ලූනු එකතු කරන්න. ලූනු වතුර ගතිය ගිහින් හොඳින් තැම්බිලා එන විට දී සීනි එකතු කරන්න. ලී හැන්දකින් එහාට මෙහාට කරමින් අඩිය අල්ලන්න නොදී හදාගන්න ඕනේ.
ලූනු පාට වීගෙන එද්දී බැදගත් හතු එකතු කරන්න. දැන් සියල්ල කලවම්කර හොඳින් පාට වනතුරුම හැන්දකින් එහාට මෙහාට කරමින් සීනි සම්බෝලේ හදාගන්න. ලුණු රස බලන්න. සීනි මදි වගේ හැඟේ නම් එකතු කරන්න. අවසානයේ දී සියඹලා ඉස්ම එකතුකර හොඳින් කලවම් කරන්න. මිරිස් කෑලි, මිරිස් කුඩු අවශ්‍ය පමණ එකතු කරන්න.
------------------------------------------
කොහිල මෝජුව
අවශ්‍ය දේවල්
කොහිල අල 2 ක්
(බර ග්‍රෑම් 250 ක්)
රතු ලූනු ගෙඩි 16 ක් විතර
(රතු ලූනු සයිස් එකෙන්
ලොකු නම් දෙකට කපන්න)
අමු මිරිස් කරල් 8 ක්
විනාකිරි තේ හැඳි 1 ක්
සුදුලූනු බික් 1 ක්
කරපිංචා කොළ කිහිපයක්
කහ කුඩු තේ හැඳි 1/4 ක්
මිරිස් කුඩු තේ හැඳි 1/2 ක්
රස අනුව ලුණු
සීනි තේ හැඳි 1 ක්
දෙහි ඉස්ම මේස හැඳි 1 ක්
බැදගැනීමට තෙල් මේස හැඳි 3 ක්
සාදන ආකාරය
කොහිල අල වටේ පොතු හැර සෝදා සිහින් තීරු විදියට කපාගන්න. කහ, ලුණු අතගාගත් කොහිල තෙල් මේස හැඳි 3 ක් පැතැලි බඳුනකට දමා ඒ මත අතුරා බැදගන්න. එහාට මෙහාට කරමින් බැදගත් කොහිල අලවල ඇති වැඩිපුර තෙල් අයින් වෙන්න පේපර් සර්වියට් එකක් මතට එක් කරන්න.
දැන් ඒ තෙලටම රතුලූනු සහ අමු මිරිස් එක් කර තත්පර කිහිපයක් බැදගන්න. බැදගත් කොහිල, රතු ලූනු, අමු මිරිස් මැටි වළඳකට එක්කර එයට, සීනි, විනාකිරි, රස අනුව ලුණු, හීනියටම කපාගත් සුදුලූනු, කරපිංචා, මිරිස් කුඩු, දෙහි ඉස්ම එක්කර කලවම්කර හොඳින් වසා පැයක් පමණ තියා කෑමට ගන්න.
මල් ගෝවා තෙම්පරාදුව
අවශ්‍ය දේවල්
මල්ගෝවා ග්‍රෑම් 500 ක්
ලූනු ග්‍රෑම් 300 ක්
වියළි මිරිස් කරල් 3 ක්
සුදුලූනු බික් 2 ක්
කෑලි මිරිස් තේ හැඳි 1 ක්
මිරිස් කුඩු තේ හැඳි 1/2 ක්
කහ කුඩු තේ හැඳි 1/4 ක්
තෙල් මේස හැඳි 3 ක්
කරපිංචා ටිකක්
කුරුඳු කැබැල්ලක්
රස අනුව ලුණු
සාදන ආකාරය
මල් ගෝවා කොටස් කපා ලුණු වතුරේ බහා තබන්න. දැන් වතුරෙන් කොටස් එළියට ගෙන එම කොටස් හීනියටම කපාගන්න. ලූනුත් සිහින්ව කපාගන්න. තෙල් පොඩ්ඩක් වෙන්න එකතුකර මල් ගෝවා ටික බැදගන්න. බැදගත් මල් ගෝවා පේපර් සර්වියට් මත තබා පැත්තකින් තියන්න. දැන් කපාගත් ලූනු, සුදුලූනු සහ මිරිස් කරල් එක්කර බැදගන්න. එයට මිරිස් කුඩු, කෑලි මිරිස්, කහ, ලුණු , කරපිංචා එකතු කරන්න. ලූනු තෙම්පරාදුව සකස් කරගත් පසු බැදගත් මල් ගෝවා ටික එකතුකර කලවම් කරන්න.
No comments:
Post a Comment